Кукмарада Бал һәм Алма спасы узды

Алсу СӘЛӘХЕТДИНОВА, 15 август 2026 - 15:30

233

Бәйрәм шәһәрнең Комсомол мәйданында оештырылды.

Без яңгырдан курка торганнардан түгел. Комсомол мәйданында узган Бал һәм Алма спасы бәйрәме дә шуны раслады.

Күргәзмә-ярминкәдә авыл җирлекләре, аерым умартачылар, шәһәрнең балалар бакчалары бик күп төрдәге бал продукциясе тәкъдим итте, мәдәният хезмәткәрләре мастер-класслар оештырды. Ярминкәдә балның ниндие генә юк! Чәчәк балы дисеңме, юкәнекеме, катнашы кирәкме... Шулай ук бал корты продуктлары: прополис, перга, чәчәк серкәсе, балавызга да төрлелек зур иде.

Бәйрәмдә район башлыгы Сергей Димитриев, “Кукмара балы” кооперативы җитәкчесе Таһир Бариев һәм башкалар танышты.

- Бал һәм Алма спасы районыбызда күп еллар дәвамында үтә. Барыгызны да бәйрәм белән тәбрик итәм, - диде район башлыгы Сергей Димитриев. - Умартачыларыбыз ел саен яхшы нәтиҗәләргә ирешәләр, бик күпләрне үзләренең сыйфатлы, яхшы баллары, бал продукцияләре белән тәэмин итәләр. Хезмәтегезне бәялим, барыгызга да рәхмәтемне җиткерәм.

Умартачыларга, күргәзмә-ярминкәгә килүчеләргә Таһир Бариев та җылы теләкләрен ирештерде.

- Бу - умартачыларның ел буе эшләгән хезмәтләренең нәтиҗәсен күрсәтә торган көн. Үз продукцияләрен алып килгәннәре, безнең белән уртаклашканнары өчен аларның һәммәсенә рәхмәт, - диде ул.

Бәйрәмдә алдынгы умартачыларга Мактау грамоталары тапшырылды.
Концерт номерлары, җыр-биюләр чарага тагын да ямь өстәде.