Кукмара имамнары өчен татар телендә викторина үткәрделәр

Туеш авылы мәчетендә «Дин - телне, тел динне саклый» дигән район викторинасы узды. Ул район мәчетләренең имам-хатыйплары өчен милли гореф-гадәтләрен саклау, татар мохитен үстерү, XIX-XX гасырлардагы дин әһелләренең мирасын өйрәнү максатыннан оештырылды.

Чара барышында Кукмара районы имам-мөхтәсибе Рәдиф хәзрәт Тимергалиев, Татарстанның төньяк төбәге казые Исмәгыйль хәзрәт Фәләхиевлар туган телне һәм гореф-гадәтләрне саклауның мөһимлеге турында үгет-нәсыйхәт сөйләделәр.

Викторина нәтиҗәләре буенча Зур Сәрдек авылы имам-хатыйбы Рифат хәзрәт Ибраһимов, Күкшел авылы имам-хатыйбы Рамил хәзрәт Садыйков, Каенлык авылы имам-хатыйбы Нәкыйп хәзрәт Халитов, Мәмәшир авылы имам-хатыйбы Вагыйз хәзрәт Нигъмәтуллин, Олыяз авылының икенче имамы Илназ хәзрәт Ибраһимовлар җиңүче булдылар.

Аларга дипломнар тапшырылды.

фото: http://dumrt.ru/