«Бер эшсезгә – 10 вакансия: Татарстанда кадрларга ихтыяҗ зур

Татарстанда хезмәт базарында кадрларга ихтыяҗ югары булып кала. Татарстанстат мәгълүматларына караганда, бүген республикада бер рәсми теркәлгән эшсез кешегә уртача 10,7 вакансия туры килә. Бу хакта «Челнинские известия» хәбәр итә.

Ел башыннан мәшгульлек хезмәтендә исәптә торучы гражданнар саны арткан. Гыйнвар аенда аларның саны 3 963 кеше булса, февральдә 4 465 кә җиткән. Апрель аенда исә рәсми эшсезләр саны 5 003 кеше тәшкил иткән.

Шуңа да карамастан, республика предприятиеләрендә хезмәткәрләргә ихтыяҗ эшсезләр саныннан күпкә югарырак булып кала. Әгәр 2025 елның гыйнварында оешмаларга 39 110 хезмәткәр кирәк булса, 2026 елның шул ук чорында бу күрсәткеч 52 441 кешегә җиткән.

Апрель аенда да хезмәт базарында кадрларга ихтыяҗ зур булган. Узган ел бу күрсәткеч 40 281 вакансияне тәшкил итсә, быел ул 53 648 гә кадәр арткан.

Белгечләр фикеренчә, бу саннар республикада хезмәткәрләргә ихтыяҗның тотрыклы рәвештә югары булуын күрсәтә.