Кукмара редакциясе хезмәткәрләре санитар-экологик икеайлык кысаларында өмәгә чыкты

«Хезмәт даны» газетасы редакциясе хезмәткәрләре Татарстанда үткәрелә торган санитар-экологик икеайлык кысаларында өмәгә чыкты.

Традиция буенча, перчатка, себерке, көрәк һәм тырмалар белән коралланып, редакция хезмәткәрләре узган кышта җыелган чүп-чарны җыештырды.

«Мин 32 ел редакциядә эшлим. Яз һәм көз айларында өмәләр үткәрү безнең өчен матур традициягә әверелде. Бердәм, тату эшлибез. Өмә - ул, беренче чиратта, бәйрәм - чисталык, тәртип һәм яхшы кәеф бәйрәме. Ә өмәне чәй өстәле артында тәмамлыйбыз», - дип уртаклашты реклама белгече Светлана Афанасьева.

Саф һавада эшләү һәркем өчен дә бик күңелле булды.

Фото: Ризилә Корбанова/ «Хезмәт даны»