Татарстанда тәүлек эчендә коронавирус йоктыруның 39 очрагы ачыкланган

Татарстанда узган тәүлектә Covid-19 белән зарарлануның 39 яңа очрагы ачыкланган. Бу хакта коронавирус буенча оператив штаб хәбәр итә, ди «Татар-информ».

Бер очрак читтән кертелгән, 38се - бер-берсе белән якыннан аралашу нәтиҗәсендә. 5 кеше дәваханәгә салынган, 34 кеше өйләрендә дәвалана.

Казанда коронавирус йоктыруның 20 очрагы ачыкланган, Чаллыда - 4, Югары Ослан районында - 5, Әтнә һәм Түбән Кама районнарында – өчәр, Биектау районында – 2, Балтач һәм Зәй районнарында - берәр очрак.

Татарстанда бу вакыт эчендә Covid-19ның 7770е очрагы теркәлгән, 6702 кеше терелгән, шуларның 50се - узган тәүлектә.

Республикада коронавирус инфекциясе корбаннарының саны 96га җитте.

Фото: «Татар-информ»