Зур Кукмара гармун моңнарына күмелде

Зур Кукмара авылы мәдәният йорты каршында "Уйнагыз, гармуннар" дигән бәйрәм үтте. Аны гармунчыларыбыз атка утырып, уйнап-җырлап, урам әйләнеп башлап җибәрделәр. Гармунчыларыбыз урамнан әйләнеп кайткач, бәйрәм мәдәният йорты каршында махсус сәхнәдә башланып китте. Чара җыр-бию, гармун моңнары һәм татар халкының милли уеннары белән үрелеп барды. Концертта Зур Кукмараның танылган гармунчылары: Хәмәт Кәримов, Рифнур Нуриев, Илгиз Зарипов Зөфәр Гайнуллин, Расим Хәбибуллин һәм "Баламышкин" гармунчылар ансамбле чыгыш ясады. Нормабаш авылыннан килгән кунак Васил Абдуллинның курай моңнары халык күңеленә аеруча хуш килде. Өч сәгатькә сузылган бәйрәмдә халык рәхәтләнеп ял итте, күңел ачты.

Гөлнур Хаҗиева