Товар урынына кирпеч салынган посылка алган

Кукмара эчке эшләр бүлегенә Мәскәүдә яшәүче бер ханым мөрәҗәгать итә. Ул сату сайтларының берсендә 11 мең сумга уен приставкасы сатучы белән килешкәнен һәм аңа акча күчергәннән соң, почта аша товар урынына кирпеч салынган посылка алганын әйтә. Җинаятьләрне эзләү бүлеге хезмәткәрләре үткәргән оператив-эзләү чаралары нәтиҗәсендә бу эшне кылган 22 яшьлек Нократ Аланы егете тоткарланды. Әлеге гражданин сату сайтларында уен приставкалары сатуы турында белдерүләр бирә, сатып-алучылар белән килешкәннән соң, акчаны Кукмарага почта күчерүе аша күчерергә куша. Хәзерге вакытта бу кешегә карата җинаять эше ачылды.