Планетаның иң өлкән кешесе 117 яшьлек гомер бәйрәмен билгеләп үтте

Бүгенге көндә планетадагы иң өлкән кеше - японка Мисао Окава үзенең туган көнен үткәрде, дип хәбәр итә РИА "Новости". Окава 1898 елның 5 мартында дөньяга килә. 2013 елда аның ватандашы 116 яшьлек Дзироэмон Кимура үлгәннән соң ул планетаның иң өлкән кешесе буларак Гиннес китабына кертелә. Туган көн Осака шәһәрендәге ул яши торган картлар йортында үткәрелә. Муниципалитет хезмәткәрләре аңа зур чәчәк бәйләме тапшыралар. 117 ел озак гомерме, дигән сорауга ул "юк" дип җавап бирә. Шулай ук Окава үзен бәхетле дип саный. Ә озак яшәвенең серен японка суши һәм яхшы йокыдан күрә. Мисао Окаваның өч баласы, дүрт оныгы,алты оныкчыгы бар.