Кукмарада быел 520ләп төп агач утыртылачак

Поселок башкарма комитеты җитәкчесе Райнур Нотфуллин сүзләренә караганда, көз көне поселокта 520ләп төп агач утыртылачак икән. Әмма тирә-юнебезгә яшеллек бирүче, экологик хәлебезне яхшыртучы, һаваны чистартучы агач-куак үсентеләрен утыртмас борын ук очларын сындырып, күпме кешенең хезмәтен юкка чыгаручылар да бар арада. Кәҗә асраучыларның үз малларын һаман иректә йөртүләре дә күпме яшеллекнең юкка чыгуына китерә. Сакалбайларга карата поселок башкарма комитеты тарафыннан "ау" да оештырылган. Бу исә бәйсез кәҗә хуҗаларын тагын да саллырак штраф көтә дигән сүз.