Кукмара полициясе патроннар һәм төтенсез дары сатарга җыенган ир кешене тоткарлаган

1-7 февральдә район эчке эшләр бүлегендә 89 гариза һәм хәбәр теркәлә, шуларның икесе җинаятьләр турында.

2 февральдә, кичке сәгать бишенче яртылар тирәсендә Лубян авылында җинаять кылына. 64 яшьлек ир-ат үзенең 40 яшьлек улы белән бергә спиртлы эчемлекләр эчә. Кинәттән килеп чыккан гауга вакытында 40 яшьлек ир-ат кулына пычак ала һәм әтисенең күкрәк өлешенә кадый. Зыян күрүче ир исән-сау, ул хәзерге вакытта район үзәк дәваханәсендә.

6 февральдә полиция хезмәткәрләре тарафыннан патроннар һәм төтенсез дары сатарга җыенган ир кеше тоткарланды.

Бер атна эчендә районда 15 юл-транспорт һәлакәте теркәлде, анда бер кеше зыян күрде, 68 кеше төрле административ хокук бозулар өчен полициягә китерелде.

Рамил НУРГАЛИЕВ, район эчке эшләр бүлеге начальнигы