Кукмаралыларны бүген нинди һава торышы көтә?

Бу арада көннәр кояшлы, җылы торса да, көзге һава торышының ышанычлы булмавын беләбез. Әйтик, бүген иртән күк йөзе чалт аяз иде, кай арада аны соры болытлар сырып алды. Синоптиклар көндезге сәгать өч тирәсендә бераз яңгыр явып үтәчәк, дип фаразлыйлар. Җир дымга туенып калсын өчен яңгыры да кирәк инде аның. Иртәгә аязучан болытлы һава көтелә, көндез 19-22 градус җылы булачак. Халыкның күңеле күтәренкедер, мөгаен: күпчелекнең бакча уңышлары инде базларга кергән, бәрәңге уңышы да сөендерде быел, басуларда да игеннәрне җыеп алу соңгы гектарларда бара. Иң мөһиме, урамда нинди һава торышы булуга карамастан, өйләрдә тынычлык, иминлек булсын.