Уйланулар: акча бәхет китерәме?

Күпләр әйтә: «Акча булса — проблемалар юк». Ә мин моның белән тулысынча килешеп бетмим. Әлбәттә, акча тормышны җиңеләйтә: ашарга, киенергә, сәяхәт итәргә мөмкинлек бирә. Ләкин ул күңел тынычлыгы һәм чын бәхетне алыштыра аламы соң?

Минем танышларым арасында бай кешеләр дә бар. Тыштан караганда, аларның барысы да яхшы кебек. Әмма сөйләшеп утырганда, борчулары, кайгылары җитәрлек икәнен аңлыйсың. Димәк, акча барысын да хәл итми. Шул ук вакытта, акчасыз да бик авыр. Кеше гел акча турында уйлап, стресс кичерә, үзен ирекле хис итми. Бу да бәхеткә комачаулый.

Минемчә, бәхет акчада түгел, ә кешенең эчке халәтендә. Якын кешеләр, сәламәтлек, яраткан шөгыль — менә нәрсә чын шатлык китерә. Ә акча — бары тик корал гына.

Ләйсән, Кукмара

Фото: «Татар-информ» МА