Анай кылыныз данъяське

Куинь арессэ тырмемез бере удмурт пие копак ӟуч луиз. Ма, ачим но талы ӧй пумитъяськы. Семья куспамы удмуртэн вераськиськом. Соин анай кылыз уз вуны, нош ӟучсэ дышыса, солы эшъёсыныз, вын-сузэръёсыныз вераськыны капчигес луоз шуыса малпай. Пичи дыръя ас вылам шӧдӥ угось кылэз тодымтэлэсь секытсэ. Эшъёсы монэн ӧз вераське, ӧз шудэ, бордысьтызы палэнтӥзы. Шуг ке но, мон дышетӥ анай кылме. Соин пиелэсь «Я не хочу больше разговаривать на удмуртском языке!» шуэмзэ кылыны туж вӧсь вал.

Но туннэ шумпотыса вераны быгатӥсько, пиелэн одӥгез яратоно урокез – удмурт кыл. Табере со выныныз но удмурт кылын вераськыны тырше. Аслым но «Анай» шуыса вазиське. Сыӵе мусо!

Кылем арын Ижкарысь кык кылын вераськись нылпиос понна «Нуныкай» центре ветлыны кутскимы. Нырысетӥ ужрад бере пиелэсь юай:

- Кельшиз-а?

- Ӧз, - шуэ.

- Малы, маин ӧз яра? Туж мыло-кыдо вуид вал, - кышкатски, оло, номырзэ валатэк пукем.

- Ӧжытгес вал, ӧзгес тырмы.

- Отын одӥг час но ӝыны дыр ӵоже ужады!

- Кызьы? Нош мон 15 минут, дыр, малпай.

Пиелэн мылкыдыз нуналысен нуналэ бурдъяське, анай кылыныз данъяськонэз сюлэмаз золгес пыӵа. Нош Татарстанысь анай-атайёс но пиналъёс анай-кылзэс дышетон сярысь мар малпало меда?

Наталья МИХАЙЛОВА, Ижкар-Вуж Каньсар