Кукмарада тиз йөрешле шахмат буенча республиканың Төньяк төбәге беренчелеге үтте (фото)

Кукмараның 4 урта мәктәбе базасында тиз йөрешле шахмат буенча республиканың Төньяк төбәге беренчелеге үтте. Анда безнең районнан тыш күрше Балтач, Саба, Мамадыш, Нократ Аланыннан барлыгы 66 шахматчы көч сынашты. Шәхси зачетта безнекеләрдән Дмитрий Алексеев 8 очко белән җиңү яулады. Ветераннар арасында 6,5 очко туплаган Камил Шәймардановка тиңнәр булмады. Икенче урында 6 очко белән Альберт Сәләхов калды. Яшүсмерләр категориясендә Ирек Галиев (6 очко), Илһам Хөсәенов, Александр Ишмикеевлар (4әр очко), кызлар арасында Диана Гәрәфетдинова (6,5 очко), Әлфия Гыйләҗева (5 очко), Камилә Билаловалар (3,5 очко) призлы урыннарны бүлештеләр. Турнирның төп өлеше тәмамланганнан соң халыкара гроссмейстер Рамил Хәсәнгатин 25 минут эчендә берьюлы алты тактада уен үткәрде. Кукмарадан Диана Гәрәфетдинова аны җинүгә иреште. Калган уеннарда гроссмейтер Зәй районы вәкиленә җиңелде, ике уенчыны җиңде, ике шахматчы белән тигез уйнады.

Шушы көннәрдә шахматчыларны Балтачта булачак төбәкара турнир көтә, ә Ирек Галиев белән Диана Гәрәфетдиновалар (тренерлары Владислав Абдулов) март аенда Сочида үтәчәк шахмат буенча Россия суперфиналында катнашачаклар. Безнең шахматчыларның район гына түгел, республикакүләм танылу алуында районның шахмат буенча федерация җитәкчесе Анатолий Головның да өлеше бик зур. Ул спортның әлеге төрен үстерү өчен матди яктан зур ярдәм күрсәтә.