Эшлекле сәфәр төбәкара хезмәттәшлекне ныгыту, авыл территорияләрен үстерү өлкәсендә нәтиҗәле тәҗрибәләр һәм алдынгы карарлар белән алмашу өчен тагын бер мөһим мөмкинлек булды.
Район башлыгы Сергей Димитриев эш сәфәре белән Кукмарага килгән Түбән Новгород өлкәсенең авыл хуҗалыгы һәм азык-төлек ресурслары министры Николай Денисов һәм аның командасы белән очрашты.
Кунакларга мәгариф, авыл территорияләрен үстерү һәм агросәнәгать комплексы өлкәләрендә районның иң яхшы тәҗрибәләре тәкъдим ителде. Делегация 3нче урта мәктәптә, Пычак һәм Әсән-Елгадагы белем бирү учреждениеләрендә булып, шәһәр һәм авыл җирлекләрендә балаларны укыту һәм тәрбияләү өчен тудырылган заманча шартлар белән танышты.
Авыл җирендә тормыш сыйфатын формалаштыручы объектларга аерым игътибар бирелде. Кунаклар авыл территорияләрен комплекслы үстерү программасы нигезендә төзелгән торак йортларны карадылар, «Нараткай» сәламәтләндерү лагеренда һәм Югары Чура мәдәният йортында булдылар. Алар районда халык өчен уңайлы яшәү мохите булдыру буенча алып барылган комплекслы эшчәнлекне югары бәяләделәр.
Районның аграр проектлары да зур кызыксыну уятты. Делегация Нырья авылындагы терлек азыгы үзәгенең, Югары Чурадагы мини-сөтчелек паркының эшчәнлеге белән танышты, шулай ук Кукмара аграр көллиятендә булды. Очрашу барышында авыл хуҗалыгын үстерү, кадрлар әзерләү мәсьәләләре буенча фикер алыштылар һәм уңышлы муниципаль тәҗрибәләр белән уртаклаштылар.
Фото: Илназ Габидуллин
«Кукмор Татарстан» МАКС каналына язылыгыз
Нет комментариев