Татарстанда мошенниклар бензин сату сылтавы белән кешеләрне алдый башлаган

Татарстанда интернет аша мошенниклыкның яңа схемасы тарала башлады. Җинаятьчеләр мессенджерларда һәм төрле интернет-төркемнәрдә арзан бәядән бензин һәм башка ягулык-майлау материаллары сатылуы турында игъланнар урнаштыра. Бу хакта ТР Эчке эшләр министрлыгының Җинаятьләрне эзләү идарәсенең мошенниклык очракларын ачыклау бүлегенең аеруча мөһим эшләр буенча оперуполномоченные Радис Юсупов хәбәр итте.

Аның сүзләренчә, мошенниклар ягулыкны 100–150 сумнан сатабыз дип ышандыра. Сатып алучылардан алдан ук акча күчерүне сорыйлар, бензинны өйгә кадәр китерергә һәм өстәмә рәвештә бушлай канистра бирергә вәгъдә итәләр.

Акчаны алганнан соң исә аферистлар элемтәгә чыкмый башлый. Нәтиҗәдә, кешеләр акчасыз да, бензинсыз да кала.

Моннан тыш, полиция интернет аша автомобильләр сату белән бәйле мошенниклык очраклары турында да кисәтә. Җинаятьчеләр ялган сайтлар, социаль челтәрләрдәге һәм мессенджерлардагы төркемнәр булдырып, чит илләрдән автомобильләр кайтару белән шөгыльләнүче компанияләр булып күренә. Күпчелек очракта Көньяк Корея, Кытай һәм Беларусьтән машина китерергә вәгъдә итәләр.

Шундый очракларның берсендә Чаллыда яшәүче кеше мошенникларга ышанып, 1,2 миллион сум акчасын югалткан.

ТР Эчке эшләр министрлыгы республика халкын уяу булырга чакыра. Белмәгән сатучыларга алдан акча күчермәскә, товар һәм сатучы турында мәгълүматны җентекләп тикшерергә киңәш итәләр.