Татарстанда изоляция режимын бозган өчен штрафлар турында сөйләделәр

Татарстан полициясендә изоляция режимын бозган өчен каралган штрафлар турында сөйләделәр. Бу хакта ведомствоның матбугат хезмәтендә хәбәр иттеләр, дип яза «Татар-информ».

Татарстан Хөкүмәтенең республикада яңа коронавирус инфекциясе таралуны булдырмау чаралары турындагы карарын тормышка ашыру кысаларында республика халкына җитди сәбәпсез үз-үзеңне изоляцияләү зоналарыннан тыш чыгып йөрүне вакытлыча чикләделәр.

31 мартта Федерация Советы тарафыннан административ хокук бозулар турындагы РФ Кодексына яңа төзәтмәләр хупланды. Аның нигезендә инфекция таралу куркынычы шартларында үз-үзеңне изоляцияләү режимын бозган өчен коронавирус йоктырмаган гражданинга 15 меңнән 40 мең сумга кадәр штраф яный.

Вазифаи затлар өчен штраф суммасы 50дән 150 мең сумга кадәр, ә юридик затлар өчен — 200дән 500 мең сумга кадәр яки 30 тәүлеккә кадәр эшчәнлекне туктатып тору каралган.

Әгәр хокук бозулар кеше сәламәтлегенә зыян салган яки үлеменә китергән очракта, ләкин җинаять билгеләре булмаганда, гражданнардан — 150дән 300 мең сумга кадәр, вазифаи затлардан — 300дән 500 мең сумга кадәр, юридик затлардан 500 меңнән 1 млн сумга кадәр штраф түләттереләчәк.

Татарстанда күзәтү «Имин шәһәр» системасы ярдәмендә Патруль пост хезмәте һәм ЮХИДИ экипажлары тарафыннан алып барыла.

фото: Рамиль Гали