Россия көне алдыннан Кукмара районында яшәүче яшь гражданнарга паспортлар тапшырылды

Район ЗАГС бүлегендә Кукмара районында яшәүче, 14 яше тулган үсмер егет-кызларга мөһим документ – паспортлар тапшырылды. Чара Россия көне уңаеннан оештырылды.  

Тантанада район башлыгы Сергей Димитриев, җитәкчеләр, паспорт алучы укучыларның әти-әниләре катнашты. 

 - Хөрмәтле укучылар. Сез бүген мөһим документ – паспортлар аласыз һәм олы тормышка беренче адымыгызны ясыйсыз. Барыгызны да чын күңелдән әлеге истәлекле көн белән котлыйм, - диде район башлыгы. - Без барыбыз да Россия Федерациясе гражданнары. Үсеп килүче яшь буын тиешле белем-тәрбия алсын, илебезнең лаеклы ул-кызлары булып үссен өчен бик күп эшләр башкарыла. Паспорт алу ул – истә кала торган вакыйга. Әлеге документыгызны югалтмагыз, саклап тотыгыз, үзегезнең Россия гражданнары булуыгыз белән горурланып яшәгез. Бәйрәм белән! 

Кукмара 4нче урта мәктәбенең 7 нче сыйныфын тәмамлаган Зарина исемле кыз бүгенге көннең үзе өчен аеруча мөһим булуын билгеләп үтте. 

 - Хәзер мин дә Россиянең чын гражданы булдым. Тантаналы төстә паспорт алу ул – зур горурлык, - диде Зарина.