Выль проектэ вуи блогер луыса

«Ключ мира» проект ӵош люказ араб, казах, фарси, турок, англи, таджик, армян, ӟуч, бигер но удмурт калыкъёсты. Ми гожъяськыны кутскись егитъёс. Котькудмы нуиськом нимысьтыз блог. Ми туж пӧртэмесь. Тросэз пӧламы кунгожсьӧрысь вуэмын, вераськиськомы но гожъяськиськомы асьме анай кылын. Но со дыре ик ми сыӵе одӥг кадесь, малы ке шуоно ми ваньмы яратӥськомы но гажаськомы вордскем кылмес. Соин ик сыӵе тунсыко проект но кылдӥз. 

Проект ужзэ мытӥз Болгар карын. Нырысетӥ нунал огшоры радъямын ӧй вал, дыр, та музъем вылын, малы ке шуоно со туж ӟеч адӟытэ кызьы пӧртэм калыкъёс, котькудӥз асьсэ осконэнызы но Инмаренызы быгато одӥг интыын тупаса улыны.

Кемалась потэ ни вал Болгаре вуылэме, ас синмыным сое адӟеме, вашкала улонэз шӧмъяме. Вераса-гожтыса быдтонтэм мылкыдын бертӥ.

Нимысьтыз вераме потэ «Музей Булгарской цивилизации» сярысь. Та музейын котькуд полкаяз вӧсяськон книгаос тыремын, кыкетӥ этажаз быдэс дуннеысь тужгес но бадӟымез Коран интыямын. Туж паймымон! Пырамы Тӧдьы мечете но. Со 2012-тӥ арын усьтэмын. Котькуд ӝытэ татын намаз, пе, ортче.

Кыкетӥез ужрадмы Вылӥ Услон ёросын «Медиапространство» быдэсросси студентъёслэн форумзы улсын ортчиз. Ми, Татарстанын улӥсь выжы калыкъёслэн егитъёссылэн Ассамблеязлэн командаез, элькун президентмылы «Ключ мира» проектмы сярысь мадимы. Рустам Минниханов радъям ужпуммес умоен лыдъяз но тау кылъёссэ вераз.
9-тӥ куарусёнэ ми, «Ключ мира» проектэ пыриськись егитъёс, Елабугае вуылӥмы. Экскурсоводмы Лариса Михайловна городлэн историеныз но солэн улӥсьёсыныз тодматӥз. Елабуга котькудӥзлы тодмо луэ, дыр, Марина Цветаева кылбурчиен, Надежда Дурова кавалеристэн, Иван Шишкин сурадаськисен но мукет дано адямиосын. 
Елабугалэн историез узыр ке но (2007-тӥ аре аслэсьтыз сюрс ар тырмонзэ пусйиз), со туала улонэн артэ но вамышъяны быгатэ. Пленэръёс, егит суредаськисьёслэн но архитекторъёслэн адӟытонъёссы, пӧртэм музейёс сое туж ӟеч возьмато. 
Елабуга аслаз вашкала юртъёсыныз но, со дыре ик туала шӧменыз котькудмылэн сюлэмаз пыриз.   

Кылем арняе ужрад Кукморын ортчиз. Вуэм делегатъёсты городмылэн историеныз, лулчеберетэныз тодматӥзы. Котькуд ужъюртъёсын милемыз кырӟанъёсын, эктонъёсын, пӧртэм сиён-юонэн пумиталлязы. Школаосын дышетскись пиналъёслэсь лэсьтэм киужъёссэс адӟыны кылдӥз. Ыжгонлэсь, писпулэсь, басмалэсь кыӵе гинэ арбериос уг лэсьто вылэм соос. Таланто нылъёс но пиос будо ёросамы! Ас дорам куноын ветлыны туж кельшиз. Ужъя мынон-ветлон дыръя Кукморлэсь вань чеберзэ уд но адӟиськы вылэм. 
Таин проект ӧсъёссэ уг на ворса. 23-тӥ куарусёнэ милемыз вите Свияжске сюрес. Туж шумпотымон, мыным но удалтӥз таӵе бадӟым ужрадэ пыриськыны шуыса, малы ке шуоно со кузьма выль эшъёс, выль малпанъёс но кысӥсьтэм мылкыд!

Майя ТАНАСЕВА, Улынгурт