Ӵужанай доры сюрес

Мон Кукморысь трос этажъем юртын улӥсько. Карамы трос машинаос. Кытын но отын адӟиськисько вож гуждор но паймымон чебер сяська клумбаос. Та пичи шаерме туж гажасько но яратӥсько. Со мыным туж дуно.
Но арлы быдэ гужем каникулъёсты ми семьяеным ӵужанае дорын ортчытӥськом. Со милесьтым кыдёкын улэ, Агрыз ёросысь Сарсак-Омга гуртын. Отын котыр емышен но губиен тырмем мур нюлэсъёс, паськыт юосын кизем бусыос, бадӟым зыл-зыл вуоссэ нуись Чаж шур. Ӵужаелэн гуртаз туж капчи шокаське, татын чылкыт омыр. 

Вазь ӵукна ик атас кырӟаса сайкатэ, пичи садаз тылобурдоос чирдо, укно улаз мерттэм сяськаосызлэн зынъёсыз йырез поромыто.

Мынам ӵужанае ньыльдон ар эмчи луыса ужаз ке но, тон усто сиён пӧзьтӥсь луыны быгатысалыд шуисько солы котьку. Кыӵе со ческыт пӧра! Ӝӧк вылаз мае пуктэ, ваньзэ шумпотыса, кылме ньылыса ик сиисько. Нош мемие ӝожтӥське, урод сиське, пе, пие. Оло гуртын сиён но мукет, меда?

Мон яратӥсько ӵужаелы юрттӥськыны. Ӵукна ик пудо-животэз возь вылэ келяськом, кыре поттӥськом ӵӧжъёсты, курег-чипыослы сиён лэсьтӥськом. Нуназе курегпуз бичаськом, кунян люктаськом. Ӝытазе яратӥсько ӵужаеным Дашка скалмес пумитаны. Велике пуксьыса гурт пуме ик мынӥськом.

Скалмес вайыса, ӵужае сое кыскыны потэ, кыскыкуз кырӟа, нош мыным кельше вӧзаз пукыны но кылзӥськыны солэсь шулдыр удмурт гуръёссэ. Вань пудомес утялтэм, ворсам бере, вуэ вакыт шутэтскыны. Быдэс нунал тыршеме понна ӵужае монэ мороженоен шумпоттэ.

Собере гужем ужан нунал бере ми бакчаысь душын мисьтӥськиськом. Ӵушкась шунды улын душысь ву нунал куспын шуна, мугорез юзмыт каре, вань жадён соку ик быре. Ӝыт выльысен кезьыт ву лэзьыса кельтӥськом мукет нуналлы.  

Ӵужанае дорозь сюрес вакчи ӧвӧл ке но, ньыль ёрос но пӧртэм элькун пыр ортчоно луэ ке но, со сюрес вылтӥ капчи мылкыдын мынӥсько. Сюлмы яратонэн пачылме, матэктӥсь пумиськонэз чидатэк возьма.

Евгений БЕКТИН, Кукмор