Шуом коррупцилы – ӧвӧл!

Берло дыре вазь ӵукнаысен бер ӝытозь асьмеос кылӥськомы коррупция сярысь вераськонъёсты. Туннэ нуналлы та тема тужгес валтӥсь луэ. Кивалтӥсьёс нуналлы быдэ кенешъёс ортчытъяло. Депутатъёс секыт югдурез тупатонэн герӟаськем катъёсты ӝог кутыны тыршо. Таӵе юанъёслы элькунъёсысь азьмуртъёс но бадӟым саклык висъяло. Ваньмыз-а шонер лэсьтӥське, шуг вераны...

Туaла улонын асьмеос ӵемысь пумиськиськом коррупцилэн пӧртэм йӧсъёсыныз. Кылсярысь, интыужъя кылкутӥсьёслэн юрттэмзы понна кузьым сётӥськом, киысьтыд конвертэн уксёед тыныд одно ик уж шедьтон пумысен юрттоз, уголовной папкадэ ворсалоз, армие мынонлэсь утёз. Таӵе югдур улонамы огшоры, нуналысь нуналэ лэсьтӥськись уж кадь йӧтэ. Калыкмы дышиз ни кузьымъёслы: мылысь-кыдысь соосты басьтыны, нокыӵе кариськытэк сётыны.

Азьло, оло, куд-ог йыружъёс сярысь ӧй но тодысалмы, нош али троссэ майтал пульыез кадь, бадӟым пельтыса телевизор пыр возьмато. Чагыр экран пыр трос учкыны луэ, кызьы шырмачъёсты кутыло. Кылсярысь, пӧсь тыл пыртӥ потам ожмаськисьёсын ужмуртьёс асьсэды туж шуш возё. Тросэз сыӵе интыосысь бертэмъёслы чаклам программая корка ӝутон борды басьтӥсько. Но кыл кутӥсьёслэн толыксы тырме пӧяськыны но кузьым басьяны гинэ. Нош сӥё-дано адямиос, мӧйы ветеранъёс пасё-пасё липетэн, кырыж укноосын, котлэсь пурасьтаны кутскем борддоръёсын выль корка потыса, отын улоно луо. Со понна тау мед шуозы, мар веранэз на.

Озьы ик берло дыре секыт югдур нылпи юртъёсын но. Анай капиталлы луыса, анай-атайёс тросэз кыкетӥ нылпи вайыны малпало, нош нылпи садъёсын кызьы азьло интыос ӧй вал, али но озьы ик ӧвӧл. Та ужпумды но умой но капчиен лэсьтӥськоз, кисыяды коньдонды трос но сое «кулэ» муртлы сётыны быгатӥды ке. Нылпи детсадын – тӥ шумпотэмын. Бен, электрон черодэз но озьы алданы луэ вылэм.

Куд-ог ужмуртъёс ӵемысь асьсэос но уг возьдасько уксё курыны: ма витьыса улод, куке адями тонтэк номыр но карыны уз йӧндыры. Воксё паймоно: макем зол выжыяськемын коррупция.

Кызьы нош коррупциен нюръяськоно? Мар кароно сое быдтон вылысь? Малпасько, калыклы кужмо кариськыны, солы пумит мыноно шуыса мылкыдзэ бугыртыны кулэ. Уго кузьмаськон уксё басьтӥсь муртъёсын гинэ герӟаськемын ӧвӧл. Таӵе ужпумез уксё сетӥсь муртъёс но кылдыто. Тросэз аслэсьтыз ужзэ ӝоген быдэстон вылысь нырысь ик коньдонэн конверт дася. Озьы капчигес но, дыр. Уго калыкен ӵош черодын сылӥд ке, ужед ар куспын но уз быдэсмы.

Озьы ке но, таӵе югдуре сюрыса, котькудӥз уг дырты кисыысьтыз коньдонзэ поттыны. Кызьы возьмато эскеронъёс, 30% улосчиос ноку ӧз выре, уз но выре «сётон-басьтон» ужъёсын. Сыӵе адямиос туж шонер лэсьто. Соос тодо, дыр, куриськонэн тупасьрадо ёзэсъёсы вазиськыны асьмеос быгатӥськомы шуыса. Озьыен, «коньдон люкась» коррупциен выремез понна уголовной уж улэ сюроз. Эшшо ке выль катъя, ужмурт ачиз ивортыны кулэ, солы кузьым сётыны выро вал шуыса. Но улонын озьы луоз шат?

Зэм но, коррупция туала улонамы тэльсе пыктос кадь лякиськемын. Соин ик та висёнлэсь одӥг гинэ эмъюм малпаса пайдаез уз луы. Оскем потэ, катьёсты чакласьёс лемтэй кадь кырмиськозы коррупциез погыртон но вормон борды.

Наталья МИХАЙЛОВА, Вуж Каньсар