Куноын Нӧрья Воршудамы

Нырья школаысь директорлэн кивоштӥсез, Лариса Константинова, Норьяла мыноно шуыса телефонэн жингыртэмез бере, мынам тодам лыктӥз кылем арын  эшъёсмес пумитаммы, соосын ӵош шулдыръяськеммы. Нош милемыз кызьы пумиталозы? – аслым ачим юан сётӥ. Адӟеммы, кылэммы вераса быдтонтэм… 

Кузь сюрес вылэ Удмуртиысь Пичи Пурга ёросэ 18 ӵошен потӥмы. «Чингыли» ансамбльысь нылъёс но, кудӥныз кивалтэ музыкаен дышетӥсь Людмила Дмитриева, мылысь-кыдысь пыриськизы пӧламы. Пумитазы милемыз ёросысьтызы «Пурга кизилиос» центрын крезен шудыса. Озьы ик тодматӥзы парказы пулэсь лэсьтэм скульптураосынызы, соослэн котькудӥзлэн  аслаз историез вань. 

Паймим Норья  черкогуртысь  нылкышно монастырзылы. Туж чылкыт утялтэмын, котырак сяськаос будо, асьсэос ик пудо вордо, нянь пыжо. 
Нош школаязы кужмо кичабконъёсын тунсыко программазэс учкимы. Норьяос кузьымъёс но дасяллям. Ми но бере ӧм кыле. Англи кылъя дышетӥсьмы, Владимир Жуков, вакчияк интынимъёс сярысь мадиз. Собере пайдаё ӝытмы котырес ӝӧк сьӧрын азьланьтӥськиз. Борис арганчимы но Норья усточиос вожмаськыса питыръязы арганзэс. Кукмор ёросысь кырӟанъёсыз туж усто кырӟаз ми сьӧры вуэм, кема аръёс ӵоже магазинамы тыршись Галина Афанасьева. 

Эктыса но кырӟаса уйшорлэсь вуэмзэ но ӧм шӧдэ. Интыязы милемыз гурт тӧрозылэн  шутэтскон базаяз, ӵыдонтэм шулдыр интые. Ноку вунонтэм кылёз уин кӧлыны выдон азямы шуныт, чылкыт тыазы пыласькеммы. Нош ӵукна султыкумы, милемыз  гурын пыжем пӧсь табань вите вал ини. 
Базаязы валъёс, пужейёс, кыр парсьёс, пониос вордо,  чорыган интыосыз но вань. Татын ик интыяськемын «Пӧйшуран музей». Пиналъёслы туж кельшиз пукыӵен ыбылыны, коръёслэсь лэсьтэм вашкала ӟечыранын шудыны. Ми валамы: гурт тӧрозы тыршыса, мылкыдзэ поныса ужа вылэм. Малы ке шуоно ужзэ но инкуазез яратӥсь адями гинэ таӵе выжыкыл дунне пӧрмытыны быгатоз. 

Кыкетӥ нуналаз милемыз Иваново-Самарск гуртэ «Виль Нянь сиён» празднике вуттӥзы, соос сямен «Выль», ческыт  ӝукен сюдӥзы. Клубазы ужа вылэм куинь ансамбль, вожъяськыса учким эшъёсмылэсь сцена вылын капчи поръямзэс.

Кыӵе гинэ ческыт удмурт сиёнзэс ӧм веръялэ: перепеч, табань, чабей ӝук, шаньги…

Быгатэ ук асьме удмурт калыкмы ужаны но, кунояны но, шулдыръяськыны но! Али но син азямы шуныт пумитамзы, капчи мылкыдзы но жингрес куараоссы. Дор паламы бертӥм бурдъяськыса, трос выльзэ тодыса.

Айна ПАВЛОВА, Починка гуртысь библиотекарь