Биерын нылпи садэ ветлӥсьёс пӧлын эктонъя вожвылъяськон ортчиз

12-тӥ оштолэзе Биер клубын нылпи садэ ветлӥсьёс пӧлын эктонъя «Шундысиос» ёрос вожвылъяськон ортчиз. Ужрад пиналъёс пӧлын удмурт эктонъёсты вӧлмытон но чеберлыкез валанзэс юнматон вылысь радъяськиз.
Вожвылъяськонэ Кукмор карысь «Ляйсан», «Берёзка», «Ручеёк», «Колокольчик», «Солнышко» нылпи садысь, Лельвиж но Шор Кумор гуртъёсь 50-лэсь трос 4–6 аресъем бигер но удмурт пиналъёс пыриськизы.
Нырысетӥ ужрадмы туж тумошо пӧрмиз. Концертмес куинь нылъёс нуизы. Соос пичи нылъёсыз но пиосыз выжыкыл дуннее Алдар кенак доры вуттӥзы. Со, пе, умойтэм ужъёс лэсьтыны яратэ вылэм. Но пиналъёслэн задор мылкыдзылы, тузӥ дэремъёссылы но быгатыса эктэмзылы паймыса, Алдар кенак умойлы берытскиз. Нылпиослы быдэс мешокен ческыт сиёнъёс кузьмаз. Люкаськем калык но усто эктӥсь пичиослы туж синмаськиз. Котькудӥз коллективез шуныт кичабонъёсын пумитаз.
Жаляса верано, вань мылкыд карисьёс вожвылъяськонлы дасяськыса ӧз вуэ. Соин ик ужрадэз табере котькуд аре ортчытыны тыршомы. Со калыккуспо эктон нуналлы сӥземын луоз. Бен, нылпи садъёсысь ӧнерчиос но кемалась куро ни вал котькуд ар бадӟымъёс понна радъяськись «Эктон дыр» вожвылъяськон выллем ик пичиослы но ужрад орчытъяны.
 

Геннадий АХМЕТОВ, «Инвожо» калык ансамбльлэн кивалтӥсез