Балтась ёросын люкаськозы удмурт егитъёс

Туэ гужем удмурт егитъёсыз ӧтиськом «БиГерд» – «Мы единый узел» форуме. Со ортчоз 28-тӥ июньысен 1-тӥ июле Балтась ёросысь Малые Лызи гуртын «Романтик» лагерьын. Отчы пыриськыны быгатэ котькуд мурт, арлыдыз 16 аресысен 30 аресозь мед луоз. Форуме лыктыны мылкыдды вань ке, заявка лэзёно 20-тӥ июнёзь. 
Та бадӟым пумиськонэз радъя «Татарстанысь удмуртъёслэн национально-культурной автономизы» огазеяськон. «БиГерд» Татарстанысь «Гырон быдтон» элькун праздникен огвакытэ но одӥг интыын ортчоз. Форуме пыриськон дунтэк. Пумиськонэ ог сю адями витё. 
Ньыль нунал ӵоже кыстӥськись форум дыръя ужалоз 4 ӧр (направление): «Творческое», «Этноблогинг», «Дизайн», «Спортивное». Егитъёслы асьсэлы кельшись ӧр быръёно луоз. «Творческой» ӧре лыктэм егитъёс тодматскозы калык кырӟанъёсын но эктонъёсын, удмурт калыклэн этнографиеныз. Та секция кельшоз кырӟаны-эктыны яратӥсьёслы. Секциез нуоз Бавлы ёросысь егит кырӟась Павел Александров. «Творческое» ӧре калык тырмыт люкаськемын ини. 
«Этноблогинг» секциын дышетозы гожъяськыны. Туала арын кинлэн социальнй сетьын – Контактын, Инстаграмын, Фейсбукын – вотэсбамез (страницаез) вань, сое блогер ниманы луэ ини. Нош кызьы вотэсбамез ваньзылы лыдӟымон, тунсыко кароно? Мар но кызьы отчы гожъяно? Дышетоз «Удмурт дунне» газетысь журналист Елена Рябина.
«Дизайн» секцие пыриськисьёс тодозы удмурт пужыосын чеберъян амалъёсыз но дышетскозы дизайн сфераын ужаны. Татчы лыктыны мылкыд карисьёслы суредаськыны быгатыны кулэ. 
«Спортивное» ӧрын спортэн эшъяськись егитъёсты возьмало. Соосты «Гырон быдтонлэн» ӵошатсконъёсаз пыриськыны дасялозы. 
Котькуд секцилэн ужам емышез возьматэмын луоз «Гырон быдтон» элькун праздникын 1-тӥ июле.
Творческой улон – со тунсыко тодматсконъёс но пумиськонъёс. Та лагере лыктэм егитъёс понна радъямын луоз дискотека, тылскем дорын гитараен кырӟан ӝыт но квест. «БиГерд» тунсыко луоз, заявкаен дыртэлэ! Заявкаен гожтэт лэзёно udm_rt@mail.ru почтае. 

Лариса ДМИТРИЕВА, Лельвиж