Азнакайда үткәрелгән чемпионатта “Аргамак” командасы күркәм күрсәткечләргә иреште

Азнакайда физик мөмкинлекләре чикләнгәннәр арасында бочче һәм пауэрлифтинг буенча республика чемпионаты булды. Анда районның "Аргамак" командасы катнашып, күркәм күрсәткечләргә иреште. Пауэрлифтинг буенча Миннегөл Семенова (Әсән-Елга, 80 килограмм үлчәү авырлыгында), Эдуард Никифоров ("Намус" ширкәте, 59 килограмм), Мәгъсүм Сәлимгәрәев (Кукмара, 72 килограмм), Илгиз Әхмәдуллин (Ядегәр, 88 килограмм), Николай Большовлар (Ядегәр, 107 килограмм) беренче урыннарны алдылар. Бочче төре буенча Төркәш авылыннан Энҗе Гәрәева, Купкадан Рәдүлә Ситдыйковалар яхшы нәтиҗәләр күрсәттеләр. Гомуми зачетта "Аргамак" командасы авыл районнары арасында пауэрлифтинг буенча икенче, бочче буенча өченче урыннарны алды. Команданы ярышларга тренер Дамир Галиәхмәтов әзерләде.