Кукмаралылар киез итек комбинаты директоры Шамил Әхмәтшин белән хушлашты (фотолар)

Кукмара киез итек-киез комбинатының генераль директоры Әхмәтшин Шамил Михәйдәр улы белән хушлашу 4 июльдә киез-итек киез комбинаты территориясендә үткәрелде. Мәрхүмне соңгы юлга озатырга район җитәкчелеге, оешма-предприятие җитәкчеләре, мәрхүмнең дуслары, туганнары, комбинатның бүгенге һәм элеккеге хезмәткәрләре, район халкы килгән иде.

Хушлашу сүзе белән район башлыгы Сергей Димитриев, Татарстан Республикасының Конституция суды Рәисе, "Кукмара якташлыгы" җирле Казан иҗтимагый оешмасы җитәкчесе Фәрхәт Хөснетдинов, районыбызның элеккеге җитәкчесе, Татарстан Республикасы Дәүләт Советы депутаты Рауил Рәхмәтуллин, сыйныфташы, дусты, "Росздравнадзор"ның Санкт-Петербург һәм Ленинград өлкәләре буенча җитәкчесе Альберт Измайлов, "ТатВойлок" җаваплылыгы чикләнгән ширкәт җитәкчесе Ринат Хөсәенов, Мәскәүдәге "Горизонт" ябык акционерлык җәмгыяте генераль директоры Александр Тимощенко, туганнары, гаилә дуслары һәм башкалар чыктылар.

Шамил Михәйдәр улы Кукмара үзәк зиратында әнисе, әтисе, абыйлары янәшәсендә җирләнде.