Манзарас мәктәбе укучылары “Билингва-2022” конкурсыннан җиңү белән кайттылар

Мәскәү шәһәрендә узган искиткеч кызыклы, барлык халыкларны берләштергән “Билингва-2022” конкурсы тәмамланды. Ни кадәрле  тәҗрибә, кичерешләр диңгезе! Конкурста катнашкан Манзарас урта мәктәбе кызларының хис-тойгылары әйтеп бетергесез! Анда кемнәр генә юк иде, хәтта барысын да санап бетерү мөмкин түгел. Балалар Дагыстан, Әзербайҗан, Әфганстаннан килгән, Россиядә нибары берничә йөз генә кеше генә калган орочей кабиләсеннән булган кызны күрдек.

Милләтләр бәйрәме узды һәм безнең катнашучыларның татар халкын, Татарстанны лаеклы тәкъдим итүләре күңелне җылыта. Шунысы сөендерә: залда утыручылар кызларыбызның костюмнарына сокланып, чыгышларын хөрмәт белән, тын да алмый тыңладылар. Оештыручылар, озатучылар, әти-әниләр алар өчен җан атып тоттылар. Без бергә һәм бу бик яхшы.

Мин укучыларымны мактарга яратам. “Билингва-2022” конкурсында  икенче дәрәҗә лауреат дипломы белән бүләкләнгән 7  “Б” сыйныфы укучысы Әдилә Низаметдинова турында берничә сүз әйтәсем килә. Мин аның белән горурланам. Ул чыгыш ясаганда бөтен зал тып-тын иде. Аның язмасындагы сүзләр һәркем өчен истә калырлык булды. Алар тынычлык, вөҗдан, игелек турында иде. Ул бу сүзләрне йөрәкләргә үтеп керерлек, күңелләрне айкап алырлык итеп җиткерә белде. Чыгышы үзенчәлекле, башкаларныкына охшамаган булды.  Әдилә һәм дәрәҗә - аның чыгышын менә шушы сүзләр төгәл характерлый. Шуңа күрә мин бу укучым белән горурланам!

Шулай ук әлеге конкурста Манзарас мәктәбенең 5 “А” сыйныфы укучылары Алсу Гарифуллина һәм Әдилә Кадыйровалар өченче урынны яулады.

Әлфия ИОРГАЧЕВА, Манзарас мәктәбенең рус теле укытучысы