Байлангар һәм Манзараста спорт мәйданчыклары ачылды (+фото)

"Бердәм Россия" сәяси партиясе инициативасы белән быел ел ахырына кадәр 45 муниципаль берәмлектә 319 мәйданчык төзү каралган иде. Сәламәт яшьләрнең өметле киләчәк икәнен аңлап һәм Универсиада объектларын төзегәндә күрсәтелгән ярдәм өчен Республика Президенты районыбызга 11 спорт мәйданчыгы бүләк итте. Бүген шуларның соңгы икесе Байлангар һәм Манзарас авыл җирлекләрендә ачылды.

Мәйданчыкларны ачу тантанасында район башлыгы Рауил Рәхмәтуллин, Россия Дәүләт Думасы депутаты Ирек Гыйльметдинов, "Строй-Гарант" төзелеш оешмасының генераль директоры Илсур Шәрипов һәм башкалар катнашты.

Спорт мәйданчыклары төзелү балаларга да, яшьләргә дә зур мөмкинлекләр тудырачак. Алар беркайчан да буш тормаслар, киләчәктә тагын да күбрәк спортчылар, чемпионнар үсеп чыгар, дип ышанабыз. Сәламәт яшәү рәвеше алып бару өчен спорт белән дус булырга кирәк!